Në kohën kur jemi në fushatën elektorale të partive politike për zgjedhjet nacionale, është rikthyer sërish çështja e meritave për marrjen e organizim
Në kohën kur jemi në fushatën elektorale të partive politike për zgjedhjet nacionale, është rikthyer sërish çështja e meritave për marrjen e organizimit të Lojërave Mesdhetare Prishtina 2030.
Është pikërisht partia në pushtet, Lëvizja Vetëvendosje, e cila po i merr meritat për marrjen e këtij organizimi.
Madje, zëvendësministrja për Kulturë, Rini e Sport, Daulina Osmani, sonte përmes një spoti ia dedikoi meritat qeverisjes aktuale.
Një vit e gjysmë më parë, në deklarimet publike, herë merrte meritat Qeveria, herë Komuna e Prishtinës me në krye Përparim Ramën.
Por, cila është e vërteta?
Burime të Ballkani.info bëjnë me dije se të gjitha meritat shkojnë tek Komiteti Olimpik i Kosovës, konkretisht Presidenti Ismet Krasniqi dhe sekretari i përgjithshëm, Besim Aliti.
Të dy janë iniciatorët e gjithë punës së kryer, përfshirë lobimin, ndryshimin e statutit të ICMG që ia mundësonte Kosovës kandidimin, si dhe të gjitha punët tjera relevante, qoftë edhe në Asamblenë Gjenerale të mbajtur në Heraklion të Greqisë në shtator të vitit 2023.
Roli i Qeverisë dhe komunës së Prishtinës, ka qenë mbështetja e kandidaturës, dhe zotimi për investime në përmirësimin e infrastrukturës nga Qeveria e Kosovës.